Monday, June 10, 2013

உங்கள் பாத்திரம்

(ஜனவரி 30,2013)

உங்கள் ஒவ்வொருவருக்கும் ஒவ்வொரு பாத்திரம் தரப்பட்டிருக்கின்றன. அவற்றை நிரப்புவதே உங்களது வாழ்க்கையின் தலையாய கடமை. எதன் பொருட்டும் 'உங்கள் அல்லாத' பாத்திரங்கள் மீது ஆசைப்பட்டுவிடாதீர்கள். நீங்கள் நிரப்ப (அல்லது விரும்பினால் காலி செய்யவோ) வேண்டிய பாத்திரத்திற்கு பிற பாத்திரங்கள் இடைஞ்சலாகவோ அல்லது எரிச்சல் ஊட்டக்கூடியதாகவோ இருப்பினும் எதையும் மறந்தும் கூட கூறிவிடாதீர்கள்; எனெனில் அவற்றில் உங்களுக்கான சாபத்தின் மொழி எழுதப்பட்டிருக்கின்றது. நீங்கள் நல்லதாய் நடக்கக்கூடுமென நினைத்துக் கூறுபவற்றைக் கூட -சாபத்தின் மொழி- தலைகீழானதாக மாற்றிவிடக்கூடும். எனவே நீங்கள் செய்யவேண்டியது ஒன்றேயொன்றுதான், நித்தமும் அமைதியாக இருப்பது. தவிர்க்கவே முடியாது எதையாவது சொல்ல உதடுகள் துடித்தால் வெளிவரத் தவிக்கும் வார்த்தைகளை பாம்பொன்றை மண்வெட்டியின் பிடியால் அடிப்பதைப் போல அடித்துக் கொண்டேயிருங்கள். உங்களுக்குத் தெரிந்ததும், ஆனால் மறுக்க விரும்புவதுமான ஒன்றிருக்கிறது - அது எவ்வளவுதான் நீங்கள் மூர்க்கமாய் அடித்தாலும் வார்த்தைப்பாம்புகள் ஒருபோதும் இறக்கவே மாட்டாது என்பது. அவை தொடர்ந்து நீங்கள் எதிர்ப்பாராத ஒவ்வொரு சந்தர்ப்பத்திலும் உயிர்த்தெழுந்தபடியேயிருக்கும். உங்களுக்கு இப்போது ஒரு சந்தேகம் வரக்கூடும், உங்களுக்கு இந்த வாழ்க்கையில் தரப்பட்ட பாத்திரந்தான் என்னவென்று. சிலவேளைகளில் உதடுகளினூடு வெளியேறத் துடிக்கும் வார்த்தைகளை, வெளியேற விடாது மனதின் உள்ளே அடித்துப் புதைக்கும் பாத்திரந்தான் உங்களுக்குத் தரப்பட்டதாகக் கூட இருக்கலாம். ஆகவே இந்த உலகில் எதையுமே நிராகரிக்க முடியாததைப் போல, ஒவ்வொரு பாத்திரத்திற்கும் அரசியல் உண்டென்பதையும் இனியாவது விளங்கிக்கொள்ளத்தான் வேண்டும்.

No comments:

Post a Comment